Knoalster annekedotes over Loze Batse en Blaauwe Joop

Knoalster annekedote


Loze Batse


Bie ons aan de Drounderkade was t aaltied n huussie van hol an. t Gong der voak ’s nommedags hail gezelleg tou, want der zat aaltied wel volk aan(stam)toavel bie ons in d’achterkoamer. Der was nog tied en der was aaltied wel aine mit n staark verhoal, dij t der echt nog tou dee. Zo schoof ook wel ais Steffie Lokken n buurman van verderop bie ons aan toavel.


Hai vertelde mie ais t volgende verhoal. Hai zee doar wel vot bie dat e t zulf nait omhaands had har, mor dat t verhoal bie zien kammeroad Batse Lukken* vandoan kwam. Over Batse zee e der ter illustroatsie bie, “al was der al n schip vol deur zien haalsgat goan, n volgende zeupie luit e der echt nait om stoan”. Op n zekerse dag gong dij dörstege Batse ais om Kloare noar n Kefee Huzen (Huizing)**, dat was noar aigen zeggen toudestieds n huuskoamer kefee stoef bie t spoor en t sielöttenstrekie.


t Verhoal speulde zuk aalmoal of in de joaren viefteg van de veurege aiw, n tied dat je nog n moatje jenever veur thuusdrinkers kopen konden in kroug (per glas en per maat).


“Ik mout n vlezze kloare hebben,” zee e tegen Riekie dij dou net achter de toog ston. Hai gaf heur n lege vlezze en zee: hier mout t mor in. Hai betuil en gong weer weg. Even der noa kwam e der weer in en zee: “k heb mie mishad. Doe hest mie net jenever geven en k mos braandewien hebben. Ken k t evenpies railen?” Joa, dat kon ja wel. Riekie schonk de vlezze weer leeg in d'grode jenevervat en uut t braandewiensvoatje kreeg e de vlezze weer vol. Hai weer vot. Bedaankt, zee e nog, mor kon zuk t laggen nait loaten.


Want wat har e doan? Hal was mit twij Vlezzen van huus goan, d'aine leeg en d’aander vol wotter. Dij mit wotter har e achter n boom, dij veur t kefee ston, verstopt en mit de lege was e der eerst hin goan. Toun har e evenpies de vlezzen omwizzeld en was mit dij vol wotter weer noar Riekie goan. Dij har der in de gaauweghaid nait eerst even aan roken en t mor vot in de jenevervat over goten. Zo haren wie draank veur haalf geld. Nou, t was mor goud ook, want wie kregen nait teveul en ook nait te min. En t smuik, toun ook nog veul lekkerder as aans.


Joa, t gong toun net as as kwoajonges dij aan t appels gappen west wazzen. dij appels smuiken ook ja aaltied beter din....

* Graddus Lukken
** Loater wuir t alom bekìnd as kefee Jan Reiling.

t Raaisverhoal van Blaauwe Joop

In de joaren zeuventeg van de veurege aiw was Joop Paauw* van t Landskaande ais mit n raaisgezelschop van Siepkes noar Peries hin west.
Toun e noa zien raaize weer ais in stamkefee Kunst bie t Bunervloat kwam, vruigen zien vrunden vot noar zien oaventuren doar in Peries.
Joop pruit toun honderd uut, over dat haile aandere mondaine leven doar in Peries, over zien bezuik aan t Louvre en van hou t is, om te eten in n bistro en goa zo mor deur.
“En hou zit dat din doar mit de vraauwlie?” vragt aine aan d’stamtoavel.
“Tjah! Doar vragst mie wat, der is mie in n bistro n aibels schier wicht in de muit kommen en doar kwam ook nog bie dat k mie haile best verstoanboar moaken kon, wat ze pruit goud Engels.”
Ja en toun?
“Toun hebben wie soamen eten.”
Ja en toun?
“Toun hebben wie n flezze champagne seldoat moakt.”
Ja en toun?
“Toun nuigde ze mie nog bie heur thuus, veur n kop kovvie.”
Ja en toun?
“Toun bin k mit heur noar huus tou goan.”
Ja en toun?
“Tjah! Toun was t nait veul aanders as bie ons op t Knoal aan t Landskaande.”

* recloametaikenoar van t Knoal