zondag, augustus 21, 2016

Recept van in zolt bakken robaiten (rode bieten)

Robaiten Aans!





Ik har al ais ervoarens opdoan mit t vis bakken in n zoltkörste. Der was ook aine dij mie zee, dat zuks ook haile best mit robaiten gaait en dat t boetendes ook nait zo stoer is om te doun. Veur dit recept hèje n druilege dag neudeg en vanzulf n kilo grovve zeezolt, n stuk of vaar vief robaiten van n middelde grötte, n onbespoten sitroune, n stuk of 5 sprikken rozemarijn (twiegen) en wieders alles op goud geluk. En zo goan je der lopies aan mit aan t waark en doun alvast in t veuren de oven aan en draaien t knopke op staand van n onderwaarmte van twijhonderd groaden

Je doun vaar eetlepels wotter deur t zolt en mengen t wat deur nkaander. d’Helfte van t zolt leggen je op de bodem van n vuurvaste schuddel.



Nou bounen je de baiten goud schoon en leggen dij op t bèrre van zolt. Je schillen nou de sitroune en leggen de schille op en rondomrond de robaiten. As ie dat doan hebben din vlijen je de sprikken rozmarijn derop en tussendeur. Je bedekken dit din apmoal mit de rest van t zolt en drukken t zachies aan, zodat t gehail volledeg deur t zolt omsloten is.

 

Intied is de veurverwaarde oven al op twijhonderd groaden. Je schoeven de schuddel in t middenvan d’oven en bakken de zoltbaiten of in om en bie n aanderhaalf uur.


As t zowied is din hoalen je de schuddel uut d’oven en bikken din de baiten onder d’haarde zoltkörste hail veurzichteg lös mit n hoamer en n baidel. As dat doan is loatje je de baiten n beetje ofkoulen en pulen din de schille der vanòf. Je snieden t nou noar aigen inzicht in vörrels of paartjes en doun ze weerom in n schuddel. Tjah! en nou kinnen je joen aigen fantasie der ais lusteg op lös loaten.




Eetse