van t pad of

vanuut de hoogte in de lucht
deur wolkenpracht en regen
zai k onder mie gelegen
t vertraauwde laand beneden
as n olde bekínde vrund
dij ik geern d’handen schud


want der was veur mie mor ain stee
en dat was mien haim doar benee

k bezong t in mien laidjes
as verhoalende vergeetmienaitjes
en verweefde t in olde dreumen
dij al daansend t laand omzeumen

d wereld onder mie zo boar en rond
mit zien siddelnde dwirrelnde luchten
brengt mie nou in n verzuchten
want wat k der nog van wait
is as bloaden in de wind verswonnen
t waaide weg uut mien stil verdrait

k bezong t in mien laidjes
as verhoalende vergeetmienaitjes
en verweefde t in olde dreumen
dij al daansend t laand omzeumen

en ik zing nou keer op keer
mien haim is mien stee nait meer