n Knoalster vertelstertje
n Markant stroatgeluud, blikkie Erdal maank de spoiken brocht ons de zummer
Nije fietse? Ho mor! Dat zat der in de joaren zesteg bie ons nog nait aan. Je kregen maisttieds n hoge fietse, dij opa aargenswoar opscharreld of touvaleg over har. t Was zotrekend n fietse op de grui. Mit van dij holten klözzen op de trappers, omdast der aans nait bie konst. t Ding har n recht stuur en wel dou n vlinderstuur har, dij was de bink van de buurt.
Vanzulf heurde der ook wat vlaggiederij aan de fietse. Ook dee al gaauw t Erdal-blikkie of n zaalfdeussie van Nivea mit n knieper derop zien entree. t Schoupoetsblikkie mit knieper wuir vastklemd mit rooie weckfles-rek of mit n bundeltje stevege PTT rekkertjes. Je bruukten doar, veur dij tied din ook hail vernuft, nog n sollegoaren-taauwchie aan t stuur, dij in verbinden mit t klepperblikkie veur de spoiken ston. Je konnen, deur der aan te trekken op dij menaar t klepperblikkie ook nog aan en uut zetten. Der waren ok gounent dij deden t op n simpelder menaaier mit n bierviltje of n speulkoarde, dij mit twij waskniepers vasmoakt wuir, mor dat roatelde ons nait haard genogt. wie vonden dat echt wat veur watjes. Mit n blikkie kost t veur nkaander kriegen dast twij stroaten wieder nog goud te heuren wast en doar was t ons ook ja om te doun. t Gong der din goud heer om zoveul meugelk lewaai te moaken en din mor rondbroezen as n motor mit t geluud van veul sjars op de kedde, zunder versnellens.
 |
| Ain van onze helden Giacomo Agostini |
Wie haren toudestieds mit nkaander n club opricht en raceden dou regelmoateg as n Giacomo Agostini of n Aalt Toersen al roatelnd rondom de Philipsflatten. En wat dij spoiken aanbelangt, smederij Mans 'Foeffie' Kleine aan de Ceresstroade har der mor goud waark van.
Geen opmerkingen:
Een reactie posten