Pompoenschuddel zunder kapsones

Mit haarst veur deure

Nou d’haarst veur deure staait krieg k regelmoateg van vrunden om mie tou pompoenen aanboden. In dizz’ tied van t joar is der aaltied volop aanbod en wat mout je doar din mit. Ook as je op toer goan deur joen aigenste pervinsie din zain je aalgedureg stallegies aan de weg, doar particulieren heur pompoenen in allerhaande moaten en soorten in uutstald hebben. t Geft vanzulf wat kleur en fleur aan t haarstege pladdelaand. t Pompoenoverschot vindt din ook op n goie menaaier zien klaanten bie de weg.
De kracht van smoak mout nait ingewikkeld wezen, vandoar dat k aaltied op zuik bin noar ainvoldege recepten. Onderstoande recept is doar ducht mie slichtweg n hail goud veurbeeld van. Ik nuim t din ook mor,

Pompoen veur in d’oven zunder kapsones.

Inholten:
1kg pompoen, schild, ontpit en in geliek dikke vörrels sneden, 3 redelk dikke siepels in ringen sneden, n schoepie zolt, n schoep meel, 1 blik tomatenpuree van 200 gram, zwaarde peper noar smoak en rode peper flinters, 150 ml oliefeulie en wat botter veur t invetten van de broadslee

Waarkwieze:
Waarm de oven veur tot 200 groaden
Beleg n invette broadslee mit de pompoenvörrels
Dou de siepelringen in n daibe schuddel en streu der din zolt overhin en kneed t goud deur nkaander. Loat t n zetje stoan, omreden de siepelderij din wat smuier van struktuur wordt. Hiernoa mengen je tomatenpuree, zwaarde peper, rode peperflinters en meel der al huzzelnd bie deur. As t aalmoal zowied is, din verstreuen je dizze siepelderij geliekmoateg over de pompoenvörrels. Je drukken t nog evenpies licht aan en begaiten t veurdat in d’oven gaait beetje bie beetje mit oliefeulie.
De baktied ligt om en bie de 30 en 40 menuten. t Is kloar as de siepelderij goud broen verkleurd en de pompoen smui mor nait slatterg van kerakter is.

Loat joe nait nuigen en eetze!